SABBATUM DOLOROSI

 
Maniféste in sua própria veniénte Dómino,
et sua própria eum baiulánte condicióne quæ baiulátur ab ipso,
et recapitulatiónem eius quæ in ligno fuit inobœdiéntiæ
per eam quæ in ligno est, obœdiéntia faciénte,
et seductióne illa solúta qua sedúcta est male 

illa quæ iam viro destináta erat virgo Eva, 

per veritátem qua evangelizáta est bene ab Angelo 

iam sub viro Virgo María.

Quemádmodum enim 

illa per angélicum sermónem sedúcta est,
ut effúgeret Deum, prævaricáta verbum eius;
ita et hæc per angélicum sermónem evangelizáta est,
ut portáret Deum, obœ́diens eius verbo.
Et sicut illa sedúcta est ut non obœdíret Deo, 

sic et hæc suása est obœdíre Deo,
uti vírginis Evæ Virgo María fíeret advocáta.

Omnia ergo recapítulans recapitulátus est,
et advérsus inimícum nostrum bellum próvocans,
et elídens eum qui inítio in Adam captívos dúxerat nos, 

et calcans eius caput, 

quemádmodum habes in Génesi dixísse serpénti Deum:
Et inimicítiam ponam inter te et inter mulíerem 

et inter semen tuum et semen eius; 

ipse tuum observábit caput 

et tu observábis eius calcáneum.
 
Ex eo enim qui ex mulíere Vírgine habébat nasci
secúndum similitúdinem Adam, 

præconabátur obsérvans caput serpéntis.
Et hoc est semen, de quo ait Apóstolus 

in epístola quæ est ad Gálatas:
Legem factórum pósitam donec veníret semen cui promíssum est.
Maniféstius autem adhuc in eádem osténdit epístola, sic dicens:
Cum autem venit plenitúdo témporis, 

misit Deus Fílium suum, factum de mulíere.
Neque enim iuste victus fuísset inimícus, 

nisi ex mulíere homo esset qui vicit eum. 

Per mulíerem enim hómini dominátus est ab inítio, 

semetípsum contrárium státuens hómini.
 
Propter hoc et Dóminus semetípsum 

Fílium hóminis confitétur,
principálem hóminem illum ex quo 

ea quæ secúndum mulíerem est plasmátio facta est, 

in semetípsum recapítulans: 

uti, quemádmodum per hóminem victum 

descéndit in mortem genus nostrum, 

sic íterum per hóminem victórem 

ascendámus in vitam.
 
 Ex Tractátu sancti Irenǽi epíscopi Advérsus hǽreses,
ad Officium lectionis in Feria sexta Hebdomadae II Adventus